ನಾರಾಯಣ ಗಾ೦ವಕಾರರವರಿಗೆ ದುರ್ಗಾದಾಸ ಗಂಗೊಳ್ಳಿ ಪ್ರಶಸ್ತಿ

                                     

                        ಯಕ್ಷಗಾನ  ಕಲಾಪರಂಪರೆಯನ್ನು  ಬೆಳಗಿಸಿದ ಹಲವು  ಹವ್ಯಾಸಿ  ಕಲಾವಿದರಲ್ಲಿ  ಕುಮಟಾ ತಾಲೂಕಿನ     ಪಡುವಣಿಯ ನಾರಾಯಣ ಅನಂತ  ಗಾ೦ವಕಾರ ಅವರ ಹೆಸರು ಮಂಚೂಣಿಯಲ್ಲಿ   ಬಂದು ನಿಲ್ಲುತ್ತದೆ . ಪಡುವಣಿಯ ಶ್ರೀಮತಿ  ಸಣ್ಣಮ್ಮ ಹಾಗೂ ಅನಂತ ಗಾ೦ವಕಾರರ  ಮಗನಾಗಿ ೧೯೪೦ರ  ಮೇ  ೧೦ ರಂದು  ಜನಿಸಿದ ನೀವು ಮೆಟ್ರಿಕ್ ವರೆಗಿನ  ಶಿಕ್ಷಣವನ್ನು ಹೆಗಡೆಯಲ್ಲಿ  ಪಡೆದು, ಯಕ್ಷಗಾನದತ್ತ ಆಕರ್ಷಿತರಾಗಿ ತಮ್ಮ ಹದಿನಾಲ್ಕನೇ  ವಯಸ್ಸಿನಲ್ಲಿಯೇ  ಅಭಿಮನ್ಯುವಿನ ಪಾತ್ರದ  ಮೂಲಕ  ಗೆಜ್ಜೆಕಟ್ಟಿ  ರಂಗಕ್ಕೆ ಹೆಜ್ಜೆ ಹಾಕಿದವರು . ಹೆಸರಾಂತ  ಭಾಗವತರಾದ  ಬಾಡದ ಶಿವರಾಮ ಹೆಗಡೆಯವರು  ಹಾಗೂ ಪಡುವಣಿಯ ಪರಮಯ್ಯಾ ಪಟಗಾರರನ್ನು ತಮ್ಮ ಯಕ್ಷಗುರುಗಳೆಂದು  ಒಪ್ಪಿಕೊಳ್ಳುವ  ನೀವು  ಎಲ್ಲಾ   ಬಗೆಯ  ಪಾತ್ರಗಳ್ಳನ್ನು ಮಾಡಲಾರಂಭಿಸಿದವರು . "ಕಚದೇವಿಯಾನಿ "ಯ ಶುಕ್ರಾಚಾರ್ಯ , ಮಾರುತಿ  ಪ್ರತಾಪದ  ಹನುಮಂತನಾಗಿ  ಪ್ರಸಿದ್ಧರಾಗಿ , ಇಂದ್ರಜಿತು  ಕಾಳಗದಲ್ಲಿ  ಮುರೂರು ದೇವರು ಹೆಗಡೆಯವರ  ಇಂದ್ರಜಿತುವಿನ  ಎದುರು  ಹನುಮಂತನಾಗಿ  ಹಲವಾರು  ಬಾರಿ  ಪಾತ್ರ ನಿರ್ವಹಿಸಿ  ಹನುಮಂತನ  ಪಾತ್ರಕ್ಕೆ  ಅನನ್ಯ  ಆಯಾಮ  ಒದಗಿಸಿದವರು . ಹನುಮಂತನ ಪಾತ್ರವನ್ನು ನಿರ್ವಹಿಸಿದ  ನೀವು ಬಡಗುತಿಟ್ಟಿನ   ಯಕ್ಷಗಾನ   ಪ್ರಪಂಚದ  ಸಾರ್ವಕಾಲಿಕ ಶ್ರೇಷ್ಠ  ಹನುಮಂತನ  ಪಾತ್ರಧಾರಿಗಳ  ಸಾಲಿನಲ್ಲಿ  ನಿಲ್ಲುವವರು . " ಭೂ ಕೈಲಾಸ " ದಲ್ಲಿ  ಎಕ್ವರ್  ಜೋಶಿಯವರ ರಾವಣ  ಪಾತ್ರದ  ಎದುರು  ನೀವು ಈಶ್ವರನಾಗಿ  ಅಭಿನಯಿಸಿ ,ಕಲಾಭಿಮಾನಿಗಳ  ಮೆಚ್ಚುಗೆ ಗಳಿಸಿದವರು . ನಿಮ್ಮ  ಈ ಜೋಡಿಯ ಜನಪ್ರಿಯತೆಗೆ ಮುಂಬೈ  ಮತ್ತು  ಗೋವಾದಲ್ಲಿಯೂ  ಆಹ್ವಾನಿಸಿ  ಪ್ರದರ್ಶನ ಏರ್ಪಡಿಸಿರುವುದು ಅಸ್ಮರಣೀಯವಾಗಿದೆ . ಕೆರೆಮನೆ  ಮಹಾಬಲ ಹೆಗಡೆಯವರ ಸುಧನ್ವನ ಎದುರು ಅರ್ಜುನನಾಗಿ ,ಚಿಟ್ಟಾಣಿ  ರಾಮಚಂದ್ರ ಹೆಗಡೆಯವರ  ಭಸ್ಮಾಸುರನ  ಪಾತ್ರದ  ಎದುರು  ಈಶ್ವರನಾಗಿ  ಹೀಗೆ  ಪ್ರಸಿದ್ಧ  ಕಲಾವಿದರೊಂದಿಗೆ  ಅಭಿನಯಿಸಿ  ಸೈ  ಎನಿಸಿಕೊಂಡವರು .

               
                                             ಉತ್ತರ  ಕನ್ನಡ  ಜಿಲ್ಲೆಯಾದ್ಯಂತ  ವಿಶಿಷ್ಟ  ಪಾತ್ರಾಭಿನಯ ,ಅರ್ಥಗಾರಿಕೆ , ಮುಖವರ್ಣಿಕೆಯಲ್ಲಿ  ಅಚ್ಚುಕಟ್ಟುತನ  ಮತ್ತು  ಕಲಾತ್ಮಕತೆ , ಸಾಮರ್ಥ್ಯಕ್ಕೆ  ತಕ್ಕಂತೆ  ಉತ್ತಮ  ಪ್ರದರ್ಶನ  ನೀಡುವ  ಬದ್ಧತೆಯಿರುವ  ನೀವು  ವೃತ್ತಿಪರ  ನಿಲುವು  ಹೊಂದಿರುವುದು  ಇಂದಿನ  ಕಲಾವಿದರಿಗೆ  ಮಾದರಿಯಾಗಿದೆ . ಅವರ ಈ   ಅಭಿವೃದ್ಧಿ  ಹಾಗು  ಸಾಧನೆಗಳನ್ನು  ಗುರುತಿಸಿ  ಕಲಾಗಂಗೋತ್ರಿ  ಸಂಸ್ಥಾಪಕರಾದ  ದಿವಂಗತ  ದುರ್ಗಾದಾಸ  ಗಂಗೊಳ್ಳಿಯವರ ಸ್ಮರಣಾರ್ಥ  ಸ್ಥಾಪಿಸಿರುವ  "ದುರ್ಗಾದಾಸ  ಗಂಗೊಳ್ಳಿ  ಪ್ರಶಸ್ತಿ  -೨೦೧೭"ನ್ನು   ಕುಮಟಾ ರಥೋತ್ಸವದ  ಪ್ರಯುಕ್ತ  ಏರ್ಪಡಿಸಿದ  ಯಕ್ಷಗಾನ  ವೇದಿಕೆಯಲ್ಲಿ  ನೀಡಿ  ಗೌರವಿಸಲಾಗಿದೆ  . ಇದೇ  ಸಂದರ್ಭದಲ್ಲಿ  ಜಾನಪದ  ಕಲಾವಿದೆ  ಪದ್ಮಶ್ರೀ  ಪುರಸ್ಕ್ರತ  ಶ್ರೀಮತಿ  ಸುಕ್ರಿ ಗೌಡ  ,  ಶ್ರೀ ಮುರೂರು ವಿಷ್ಣು  ಭಟ್ , ಡಾ  ಎಂ  ರ್  ನಾಯಕರನ್ನು  ಸನ್ಮಾನಿಸಲಾಯಿತು .